فى اخر تحليل للمؤشر السبعينى بتاريخ 31/12/2015 اتكلمنا عن بعض النقاط فى ملخص بسيط نذكر بيها الساده القراء اولها ان مقاومه 385 هى اولى المقاومات للمؤشر واضطدم المؤشر بهذه المقاومه وارتد هابطا وتانى حاجه اتكلمنا عنها هى الثبات فوق مستوى 371 لاستكمال الاهداف الايجابيه اللى قلناها زى مستويات 390-400 فى المدى القصير وتالت حاجه ان اداء المؤشر السبعينى افضل نسبيا فى الفتره الاخيره من اداء المؤشر الثلاثينى
على الشارت الحالى مافيش كلام كتير يتقال غير ان المؤشر واجه كلستر مقاومه عند مستوى 385 وكان طبيعى التراجع منها والى الان التراجع مقبول طالما احتفظ المؤشر بدعمه عند 371 وحتى لو نزل شويه هيواجهه سوبركلستر دعم عند منطقه367-371 (دعم الترند الصاعد ونسبه 38.2% فيبوناتشى من اخر موجه صاعده ودعم افقى) وبعدها كلستر دعم عند مستوى 365
ربما من الايجابيات التى ظهرت ونرجوا ان تستمر ان المؤشر كسر مستوى 371 كسر كاذب واغلق عند 372 واتكونت شمعه شبيهه بالمطرقه و ان كنا عاوزين ذيل الشمعه دى يكون اطول شويه لكن بالتاكيد تحتاج الشمعه للتاكيد
اعتقد ان اخر جلستين فى الاسبوع ده هيحددوا اتجاه المؤشر بشكل كبير سواء الارتداد صعودا او تكمله الهبوط ولو انى شايف ان الاسواق الغربيه بدءت تتماسك وترتد صعودا وكالعاده السوق المصرى بيحب يجامل فى الهبوط بزياده شويتين
