بسم الله الرحمن الرحيم
تناقش معايا بعض الاصدقاء عن المتاجرة فى البورصة وعما
كتبته عن دور المحللين والمستثمرين فى البورصه ولاقيت ان بعضهم بيتكلم عن مفهوم مغلوط وهو ان الاسهم تقعد وهى
خسرانه فى الاخر –حسب كلامهم انها لا بتاكل ولا بتشرب- وبدل ما احول الخساره
الدفتريه الى خساره حقيقيه خلى الاسهم لحد ما يجى وقت واكيد السوق هيرتفع فيه
الحقيقه ان الرد عليهم كان سهل جدا وانا حبيت انى انقله
هنا عشان الفائده تعم واستوفى الموضوع من
كل جوانبه ونحاول تصحيح الاخطاء بقدر المستطاع
اولا من حيث ان الاسهم لا بتاكل ولا بتشرب فاكيد ده فاهم
خاطىء لان الاسهم بتاكل وبتشرب فعلا بتاكل
سعادتك من قيمه الفلوس نفسها الموجوده فى الاسهم دى وبتاكل من صحتك وتشرب من دمك
يا ترى لو سئلت الناس اللى بتاجر فى البورصه انت كام مره
دمك اتحرق؟ وكام واحد فيكم اصبح مريض بسبب البورصه-نسئل الله العافيه للجميع- هو
ده مش لوحده كفايه ان الاسهم بتاكل وبتشرب؟
طيب تعالى احسبهالك عمليا ازاى بتاكل وبتشرب وانت مش
حاسس
انا هفترض ان محفظتك كانت 100.000 فى 2008 واصبحت فى 2015 80.000 طيب طول
السبع سنين دول بعيد عن ال 20.000 الخساره انت عندك خسارتين كمان خساره فى القيمه
الشرائيه للفلوس وقدرتها على تلبيه احتياجاتك نتيجه للتضخم واللى بيتقال عليها
تكلفه غير منظوره وفى اخر احصاء كان التضخم الاساسى 11.4% عن شهر ديسمبر الماضى
و7.5% بعد استبعاد الاسعار المتقلبه للخضر والفواكه طبعا الارقام دى ارقام حكوميه
يعنى هتلاقيها اقل من الواقع لكن انا هفترض انها صحيحه وهحسب متوسط التضخم السنوى
على اساس 5% مش 7% ولا اكتر يبقى سعادتك فلوسك الخسرانه فى البورصه طول السبع سنين
دى لو حسبنها على اساس 80.000 يبقى فلوس حضرتك قوتها الشرائيه بتنخفض بمعدل 4000
سنويا اضربهم بقى فى 7 سنين يعنى فلوس سعادتك قيمتها فى 2015 بقيت 52000
(4000*7=28000 مطروحه من 80000) وخساره تانيه اسمها تكلفه الفرصه البديله بالمعنى
الاقتصادى وليس المحاسبى وعندنا فى المحاسبه مش بتتسجل الفرص او المنفعه المضحى
بها وببساطه كده تكلفه الفرصه البديله او
الضائعه معناها تكلفه البديل اللى انت اخترته مقابل التضحيه بمنفعه لو اخترت بديل
اخر
بمعنى انك اخترت المتاجره فى البورصه واتكلفت خساره وقت
وفلوس فى مقابل انك مثلا كنت ممكن تحقق منفعه لو اودعت الفلوس دى فى بنك
تعالى كده نحسب تكلفه الفرصه البديله
وانا هحسبها على اقل منفعه وهى فايده البنوك
البنك الفوائد
على الودائع هنقول بمتوسط 9% نطرح منها 5% بتاعه التضخم هنحصل على الفائده الصافيه
يعنى القيمه المضافه الحقيقيه لفلوسك هذه الفائده الصافيه بتساوى 4% سنويا اضربها
فى 100.000 يعنى فلوسك هتزيد 4000 كل سنه بعد استبعاد اثر التضخم عليها يعنى بعد 7
سنين هتكون 128.000 فى حين فلوسك فى
البورصه بعد 7 سنين بتساوى 52000 يعنى سعادتك خسران كاجمالى 128000-52000 = 76000
ولاحظ كمان ان ال20.000 لما تستردهم ابقى اطرح منهم اثر التضخم لكن خلينا مبدئيا
كده نقول فى المثال الموجود ان الخساره 76000 مابين خساره فعليه وخساره غير منظوره
طيب يا ترى لو اخترت بديل اخر اكتر منفعه زى انك لو اخدت
100.000 دول فى 2008 ورحت كشريك ممول مع اى مقاول بيبنى عماره سكنيه وقلتله خد يا
عم شغلى الفلوس دى معاك بحسبه بسيطه كده 100.000 هتاخد عليهم 100.000 زيهم والدوره
الزمنيه لاسترداد الفلوس والمكسب فى قطاع المقاولات ما بين 2 سنه الى 3 سنوات يعنى
بعد 3 سنين كان هيكون معاك 200.000 ولو دخلت مره تانيه بيهم هيكون معاك بعد 6
سنين 400.000 يعنى هتوصل ل2015 وانت معاك
400.000 واضربهم فى 5%متوسط التضخم هتحصل على صافى القيمه الشرائيه لفلوسك الحاليه
والمقدره ب260.00 وانت قاعد فى البورصه بتغنى ظلموه وبتقول الاسهم لا بتاكل ولا
بتشرب
بالمناسبه فى دراسات الجدوى للمشاريع او اتخاذ القرار
انك تدخل تتاجر فى البورصه ولا لاء بياخدوا فى الاعتبار المقارنه بين العائد من
البورصه والعائد من البنك وفى حاله لو العائد من البنك اعلى من العائد من البورصه
بيترفض قرار المتاجره فى البورصه وفى ناس بتعمل كده كافراد حتى مش مؤسسات
طبعا مع ارتفاع الفايده فى البنوك هذه الايام تم سحب 100
مليار من مختلف القطاعات بشكل عام ودخلت البنوك
ودائما وابدا علمونا فى الاقتصاد ان ارتفاع سعر الفايده
اجراء روتينى لتقليل المعروض من النقود كأداه من اداوت كبح التضخم وده له انعكاسه
مباشره على اسواق السندات والاسهم ثم القطاع العقارى
اخر النصائح للاخوه الخسرانين فى البورصه انت محتاج كاش
فى ايدك تجيبه ازاى ده مشكله سعادتك المهم انه يكون معاك كاش وطبعا من المفترض فى
تقسيم اى محفظه فى الاتجاه الصاعد انك بتحتفظ بجزء بسيط سيوله من 15%- 20% وفى
الاتجاه الهابط بفضل التلتين سيوله والتلت تشتغل بيهم او على اقل تقدير النص والنص
المهم انك تنتظر القاع القادم وتاجر مع اى ارتداد لاعلى
طالما ان المؤشر هابط على المدى المتوسط واكتفى بمكسب بسيط ولو حتى 200 جنيه بدون
تحقير لضاله المبلغ فيكفى الاثر النفسى اللى هيلعبه المكسب حتى ولو ضئيل فى تغير
نفسيتك واعطاء مزيد للثقه فى نفسك وده هيكون له اثر فى تحسين قرارك طبعا ده مش
هيكون بمعزل عن الانضباط اللى قلنا عليه ويا ريت ما تحولش اى عمليه انت كسبان فيها
لخساره فى الوقت الحالى لازم تعيد صياغه تفكيرك وتغير طريقه متاجرتك ده لو عاوز
تبتدى تعوض خسايرك واحده واحده اما بقى لو انت مستنى س او ص انه يقولك توصيه
ويختار لك سهم فما تلومش غير نفسك
بالنوفيق للجميع
