بسم الله الرحمن الرحيم
- بالنسبه لقرار البنك المركزى الاخبر باعاده هيكله الاقراض فى الجهاز المصرفى وتخفيض تركز التوظيفات الائتمانيه لكبار العملاء وتخفيض الاستثمار فى صناديق النقد (والمقصود بها استغلال فوائض البنوك فى الاستثمار فى اوراق قصيره الاجل بعائد بسيط ومخاطر منخفضه مثل اذون الخزانه وشهادات الايداع والكمبيالات المصرفيه)- الاسنثمار فى صناديق النقد تختلف عن الاستثمار فى صناديق الاسهم حتى لا يتم الخلط بينهما واعتقد ان تعمد الخلط بينهما سبب فى جزء من هبوط السوق- وطبعا طلع اللى زيط مع الزيطه اللى بتقول ان القرار ده هو السبب فى البانيك اللى حاصل فى البورصه وطبعا الخبراء المبجلين اللى زيطوا قبل كده وصقفوا لقرار وزير الماليه فى جكومه الفنكوش السابقه لما قال ان تخفيض العمله بقى امر لا مفر منه وان تخفيض العمله هو اللى هيزود الصادرات وهيزود الاستثمار الاجنبى وكلام من هذا القبيل هما هما اللى بيقولوا الان ان اجراءات البنك المركزى هى السبب فى البانيك ده واظن اننا فى مقال فى يوم 8/9/2015 فى البلوج ده قمنا بالرد بشكل علمى مفصل عليهم عن مخاطر تخفيض العمله فى بلد يستورد اكتر من 60% من احتياجاته دون وجود ضوابط معينه بحيث اننا نقلل من اثر التضخم اللى هيتحمله المواطن الفقير وحاليا احنا بنتكلم عن نسبه 11.4% تضخم اساسى طبقا لاخر الاحصائيات عن شهر ديسبمر الماضى ومتوقع ان يرتفع التضخم بنسبه 4% العام الحالى لو تم تخفيض الجنيه وهنرد بردوا بشكل متوازن عليهم حاليا
- برغم اختلافى مع سياسه الفنكوش اللى فى البلد دى بس لو فيه قرار كويس مافيش مانع ان الواحد يتكلم عن ايجابياته وقرار هيكله الاقراض ده واحد من القرارات اللى ممكن تساهم ولو بجزء بسيط فى وقف الهبل اللى بيحصل فى استيراد سلع استهلاكيه تحتاج لعلمه اجنبيه فى ظل ندره العمله الاجنبيه ونقول ارقام على سبيل المثال لا الحصر على استيراد سلع استهلاكيه لا قيمه لها ويمكن وجود بديل مصرى لها زى الاعواد القطنيه للاذن والادوات المكتبيه اللى مصر بتستوردها بـ7 مليار جنيه سنويا بالاضافه لحاجه زى اكل القطط والكلاب اعزكم الله اللى بيتم استيرادها باكتر من 2 مليار جنيه سنويا ده غير قطع غيار السيارات اللى مصر بتستوردها شهريا بمليار دولار
- القرار حتى لو له اثر سلبى فى المدى القصير لكن كل قرار اقتصادى له ايجابياته وسلبياته والمهم الهدف الاكبرمنه وزى ما بنوك هيقع عليها ضرر من تخفيض نسبه الاستثمار من 5% الى 2.5% فى صناديق النقد فيه بنوك هتستفيد من القرار ده من حيث ان حجم الاموال المستثمره فى هذه الصناديق لم تصل الى نسبه 2.5% وبالتالى هيكون عند البنوك دى الفرصه فى منح وتمويل مشروعات على نطاق اوسع ولو تم تنفيذ القرار بالصوره المطلوبه وبتسهيلات دون تعقيد تقدر البنوك بسهوله انها تمول المشروعات الصغيره والمتوسطه -بدل ماهى شغله البنوك الحاليه هى تمويل عجز الموازنه- مع وضع رؤيه سياسيه واضحه لمستقبل البلد بشكل عام واجراءات حكوميه مناسبه لاحلال المنتج المحلى بدلا من المنتج المستورد وتشجيع البنوك على تمويل المشروعات الصغيره والمتوسطه يقدر الاقتصاد يتحول من انتاج استهلاكى الى اقتصاد انتاجى لو صدقت النوايا والا اصبحت هذه القرارات حبر على ورق
- فى اليومين السابقين تبارى الكل فى ابداء اسباب انهيار السوق ومن هذه الاسباب ماهو فنكوش ومنها ماهو حقيقى ومش بعيد يقولوا انها مؤمراه من الاله ابن ابى فلسعه-اللى هو حاط مصر فى دماغه- مع الماسونيه العالميه لاسقاط دوله 7-3 وده متوافق تماما مع انهيارات البورصه اللى بدءت بعد فوز الاهلى-باعتبارهم الشياطين الحمر- على الشرطه 3-7 وعلى طريقه مدحت شلبى اقول من وجهه نظرى الشخصيه التى لا قيمه لها ان السبب الحقيقى لانهيار البورصه غير معلوم حتى الان وقد نعرفه خلال الايام القادمه ومن الان وحتى معرفه السبب الحقيقى نفتح المزاد لمزيد من الاسباب وعلى طريقه ثلاثى اضواء المسرح فتح المزاااااااااد .... فتح المزاااااااااااد
